ឌុយបៃ៖ សេចក្តីប្រកាសរួមស្តីពីប្រព័ន្ធស្បៀងដែលមានភាពធន់ និរន្តរភាពកសិកម្ម និងសកម្មភាពអាកាសធាតុ ត្រូវបានប្រកាសជាផ្លូវនៅ COP28 នាទីក្រុងឌុយបៃ។

រដ្ឋមន្ត្រីក្រសួងបរិស្ថាន និងជាតំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនែព្រះរាជាណាចក្រកម្ពុជា លោក អ៊ាង សុផល្លែត បានចូលរួមជាមួយបណ្តាប្រមុខរដ្ឋ ប្រមុខរដ្ឋាភិបាល ជាង ១២០ ប្រទេស អនុម័តលើសេចក្តីប្រកាសរួមស្តីពីប្រព័ន្ធស្បៀងដែលមានភាពធន់ និរន្តរភាពកសិកម្ម និង សកម្មភាពអាកាសធាតុ នារសៀលថ្ងៃទី១ ខែធ្នូ ឆ្នាំ២០២៤ នៅទីក្រុងឌុយបៃ។

ក្នុងឱកាសនោះមានប្រទេសជាច្រើនបានផ្តល់ការគាំទ្រទាំងបច្ចេកទេសនិងថវិកាដែលប្រកាសរួមនេះនឹងផ្តល់សារសំខាន់ចំពោះ ការធ្វើឱ្យប្រសើរឡើងនូវជីវភាពសហគមន៍មូលដ្ឋានដែលងាយរងគ្រោះនឹងការប្រែប្រួលអាកាសធាតុ។

សេចក្តីប្រកាសរួមនេះក៏នឹងផ្តល់សារសំខាន់ចំពោះ ការលើកកម្ពស់សន្តិសុខស្បៀង និងសុខភាពស្បៀងអាហារដល់ប្រជាពលរដ្ឋខ្វះខាត និងទទួលការបាត់បង់និងខូចខាតពីគ្រោះធម្មជាតិបណ្តាលមកពីការប្រែប្រួលអាកាសធាតុ ព្រមទាំងពង្រីកការអនុវត្តកសិកម្មវៃឆ្លាត និងបញ្ចេញកាបូនតិច ដែលជាផ្នែកមួយនៃសកម្មភាពបន្សាំនិងកាត់បន្ថយការប្រែប្រួលអាកាសធាតុ។

គួរឱ្យដឹងដែរថា សារសំខាន់នៃប្រកាសរួមនេះ មានខ្លឹមសារស្របទៅនឹងការតាំងចិត្តរបស់រាជរដ្ឋាភិបាលស្តីពីកសិកម្មវៃឆ្លាត ការកាត់បន្ថយការបញ្ចេញកាបូន និងការអភិវឌ្ឍដោយចីរភាព៕